బాదం Vs పల్లీలు.. గుండె ఆరోగ్యానికి ఏది బెస్ట్..?
బాదం Vs పల్లీలు. ఆరోగ్యంగా ఉండాలంటే డ్రై ఫ్రూట్స్ తీసుకోవాలి. అందులో ప్రధానంగా బాదం గురించి ఎక్కువగా చెబుతారు. పల్లీలు మంచి ఆరోగ్యాన్ని అందిస్తాయి. బాదంలో ఉండే పోషకాలు గుండెతో పాటుగా శరీరానికి ఎంతో మేలు చేస్తాయి. పల్లీల్లోనూ ఔషధ గుణాలు ఉంటాయి. ఈ రెండు నట్స్ లో గుండె ఆరోగ్యానికి ఎక్కువగా ఏది బెస్ట్ అనేది చాలా మందిలో ఉన్న సందేహం. దీనికి నిపుణులు స్పష్టత ఇస్తున్నారు. రెండింటితోనూ ఉన్న ప్రయోజనాలు వివరిస్తున్నారు. అదే సమయంలో జాగ్రత్తలు సూచిస్తున్నారు.
గుండె ఆరోగ్య పరిరక్షణలో కూడా బాదం కీలక పాత్ర పోషిస్తుంది. ఇది చెడు కొలెస్ట్రాల్ (ఎల్డీఎల్) స్థాయిలను తగ్గించడంలో, రక్తనాళాలను ఆక్సిడేటివ్ నష్టాల నుంచి కాపాడడంలో, రక్తపోటును నియంత్రించడంలో తోడ్పడుతుంది. బాదాన్ని పచ్చిగా, వేయించి లేదా ఆల్మండ్ బటర్, ఆల్మండ్ మిల్క్ రూపంలో కూడా తీసుకోవచ్చు. ఈ వైవిధ్యం దానిని ఆహారంలో సులభంగా చేర్చుకునేలా చేస్తుంది. వేరుశెనగలు ఆరోగ్యకరమైన కొవ్వులు, నియాసిన్, ఫోలేట్, విటమిన్-ఇ వంటి పోషకాలతో సమృద్ధిగా ఉంటాయి. అలాగే ఇందులో ఉండే రెస్వెరాట్రోల్ అనే యాంటీ ఆక్సిడెంట్ శరీరానికి పలు ఆరోగ్య ప్రయోజనాలను అందిస్తుందని చెబుతున్నారు. ధర పరంగా కూడా వేరుశెనగలు బాదంతో పోలిస్తే తక్కువ ఖర్చుతో లభిస్తాయి. ఒక ఔన్సు బాదంలో మీ రోజువారీ అవసరానికి సరిపడా విటమిన్ ఇ, 77 మిల్లీగ్రాముల మెగ్నీషియం అందుతుంది.
పరిమితంగా తీసుకుంటే ప్రయోజనాలు రక్త ప్రవాహాన్ని మెరుగుపరచడంలో బాదం పప్పులు అద్భుతంగా పనిచేస్తాయి. మెగ్నీషియం రక్తపోటును, బ్లడ్ షుగర్ లెవెల్స్ను అదుపులో ఉంచుతూ హృదయ సంబంధిత ఒత్తిడిని నివారిస్తుంది. పల్లీలు కూడా గుండెకు సమానమైన రక్షణను అందిస్తాయి. వీటిలో అసంతృప్త కొవ్వులతో పాటు ఎక్కువ ప్రోటీన్, నియాసిన్ , ఫోలేట్ ఉంటాయి. ముఖ్యంగా వేరుశెనగపై ఉండే పలుచని తొక్కలో లభించే నియాసిన్ శరీరంలోని చెడు కొలెస్ట్రాల్, ట్రైగ్లిజరైడ్లను తగ్గించి, మంచి కొలెస్ట్రాల్ను పెంచుతుంది. వారానికి కనీసం రెండుసార్లు వీటిని తినడం వల్ల గుండె జబ్బులు, పక్షవాతం ప్రమాదం తగ్గుతుందని పరిశోధనలు చెబుతున్నాయి. మానసిక ఒత్తిడి అనేది గుండె ఆరోగ్యాన్ని దెబ్బతీసే ప్రధాన అంశంగా మారింది. అయితే ప్రతిరోజూ పల్లీలు తినే వ్యక్తులలో ఆందోళన, ఒత్తిడి స్థాయిలు తక్కువగా ఉన్నట్లు పరిశోధనలు సూచిస్తున్నాయి. దీంతో.. ఈ రెండు గుండె సంబంధిత సమస్యల నుంచి రిలీఫ్ ఇచ్చేవిగా నిపుణులు స్పష్టం చేస్తున్నారు.
